خمسين خطوة حب

لجبال ما قط امنعت شجر عن التغصين
ولامواج ما قط وقفت عن السفر ربان
والنخلة تثمر لو سقتها الأرض سبع سنين
والكون يضحك لو فرح بين البشر حزنان
والعشبة تبحث عن عمرها في مصير العين
والشعب في عرض الزمن يبحث عن الميزان
وانته خليفة يا سفر عمره وصل خمسين
يومية نسمع لك خبر يعطي عمرنا الحان
تحمل موازين العدل سنين ويا بنين
وتروي رياحين الفعل وين الفعل ما بان
تقرا حجي اللي جابلك قبل الحجي في العين
وتهندس الليل بضوا وتسندس الفرجان
الطيب من زود الوفا في كل خطاك يبين
واللي في قلبك في الشفه وكل ثروتك الانسان
خليفة انته حكمتك ما تنقسم لاثنين
الورد واحد والزهر وقت الربيع ألوان
خمسين عام في العمر من يدرك الخمسين
وهي مثل وقت الضحى بلون الفجر مليان
خمسين عام في العمر من يدرك الخمسين
وأيامها مثلات النهر تروي ثرى ظميان
خمسين عام في العمر من يدرك الخمسين
تعكس تجارب من مشى يزرع هوى الأوطان
خمسين عام في العمر من يدرك الخمسين
مرسومة في حكمة رجل صعد لهب نيران
خمسين عام في العمر من يدرك الخمسين
ترسم ملامح من قضي عمره وهو يقظان
كل الشوارع في المدن ويا القري دارين
حكمة خليفة اللي هزمت دوامة الإشجان
منهو زرع كل المصانع بحجي ذراعين
منهو رفع صوت الجوامع من بنى الإسكان
منهو تدافع من سمع في بلاده ملتاعين
باكبر فجيعة في الهوا قطت علينا أحزان
منهو صعد فوق الكوارث والألم والبين
منهو تألم لو لقى له أي طفل ينهان
منهو اللي قال ان البياض يؤسس الألوان
منهو فتح باب الرزق حق ناس محرومين
منهو اللي حق باب السعد فتح لنا ألبيبان
ما ظنتي أوزن فعل في عام أو عامين
وف كل فعل يولد فعل احرص من ألقبان
خمسين عام يا خليفة وانته والبحرين
مثل الهوا ويا الهوا والموجة والشطآن
خمسين عام يا خليفة وانته والبحرين
انها تطلع للسما من شهقة المرجان
خمسين عام يا خليفة وانته والبحرين
تاريخ يطوي كل بحر وانته له السكان
خمسين عام يا خليفة يا ابيض الكفين
وانته مثل المواسم للفرح عنوان
ليلك نهارك يا خليفة وانته قول أيدين
تمشي محمل هالبلد بشراع وألف حصان
ليلك نهارك يا خليفة وانته دوم تعين
الناس وما تنسى ابد لو ابعد الجيران
تفرح إذا جا لك خبر عن ناس فرحانين
تتعب وتغزل من تعب روحك حصابي ودان
اشلون ما نجي لك خليفة واحنا عطاشنين
حق حكمتك لما تقول يا فلان ويا فلان
في الشده خلكم يم بعض بالوحدة مربوطين
جذع البلد ما ينحني لو في العواصف كان
أيادي عشرة والعمل بين الصخر والطين
عرقها في طول الثرى ينضح لنا بريحان
أيادي عشرة خير من يد تنكسر وتلين
أيادي عشرة بالعمل ترفع لنا البنيان
خلكم وسط ليل العواصف يا أهلي متجمعين
أقوى العواصف ما اقدرت تكسر يد الأوطان
وقت العواصف افز عواف شمال والا يمين
كل العواصف تنحني لصاحب عزم وايمان
خلكم مثل جذر النخل بالديرة متمسكين
في الروح زرعوها بوفا وغطوها بالاجفان
خلكم على طول الزمن في الدنيا متقدمين
بس بالتقدم يا هلي تتوهج البلدان
خليفة يا حلم مشى صوب الضوا بريلين
تحلم تخلي هالبلد سيدة البلدان
اقول وآنه اللي حلم يلقى هل البحرين
مثل الكواكب في السما يتناسلون اكوان
الحب في شرع البشر ما هو ترى نوعين
الحب اخلاص ف عطا له قوة البركان
منهو قدر يوصف لنا ف قصيدة او ثنتين
خمسين عام في محبة دانة الخلجان
منهو قدر يوصف لنا ف قصيدة او الفين
تاريخ يحجي عن مواقف بو علي وسلمان
خليفة تاريخك تجارب فوق اي تثمين
منهو يثمن تجربة تحوي زمن الازمان

خليفة غيم السعد

الليل غير الضحى والشمعة غير القمر
والخيمة غير الفضا والغبة غير الطور
والفرحة غير الحزن والحصوة غير الدرر
والمد غير الجزر والباب غير السور
وخليفة باب الندى وخليفة باب الشجر
وخليفة باب المدى وخليفة باب النور
مثل الفرح في الفرح يومية يبدع ثمر
ويفعل المملكة ويزرع فضاها سرور
ان هو حجى تلتقي ف لسانه احلى الصور
وان هو تحرك شبر مشت وراه بحور
وان هو وعد تلتقت تلقى الوعد لك حضر
معطر بالزهر وبكل حلو مخفور
خليفة انت الذي كررت صبح وعصر
ان اللي عدل يبني حضارة نور
واللي بنى هالوطن حقه وحق البشر
في طول وعرض الزمن يبقى دهر مذكور
وانسان هذا البلد هو ثروته ف كل عصر
بوقفته في العسر اكبر صعب مقدور
انسان هذا البلد هو ثروته ف كل عصر
غواص مثل السمج في كل بحر مخطور
انسان هذا البلد هو ثروته ف كل عصر
زراع خلا الصبخ ينتج عسل وتمور
انسان هذا البلد هو ثروته ف كل عصر
قلاف خلا السفن في المستحيل تدور
انسان هذا البلد هو ثروته ف كل عصر
صناع اسمه على لوح الزمن مسطور
انسان هذا البلد هو ثروته ف كل عصر
عامل وبين العرق سحب ذهب مطمور
انسان هذا البلد ثروته ف كل عصر
يضوي ولا ينتظر كلمة يبه مشكور
هذا اللي قلتهه لنا يا بو علي من دهر
واحنا على كلمتك عبرنا بر وبحور
ونقول للي سمع عن بوعلي او نظر
افعاله هاللي جعلت من يا لسه مبهور
افعال ما تنوصف بحروف والا بصور
منهو بيوصف ندى وقظ في دربه سحور
خليفة انت الفعل في ايام تنبع سفر
من شمس ما تختفي باصبع حجر اوتور
تاريخ حبك لنا معروف عند البشر
واللي اقوله ف شعر في كل شفه منثور
ما بين ارض الوفا وخليفة روح المطر
نسب ودم صله وسر في الثرى وجذور
ما بين ارض الوفا وخليفة قلب المطر
ربطة بحر بالبحر او سدره بالعصفور
ما بين ارض الوفا وخليفة برق المطر
علاقة اهل البحر بالرده حق الدور
ما بين ارض الوفا وخليفة موج المطر
رجفة جداول هوا في كل شبر معمور
ما بين ارض الوفا وخليفة خير المطر
كالجذع ويا الغصن يعزف حنانه زهور
خليفة يا بوعلي يا نظرة فوق النظر
تسمع دبيب الضحى لو في الدجى مطمور
وتقول لنا بحكمة لها ف سمانا اثر
هالمملكة بترتفع دام الوفا دستور
وآقول آنه الذي قلبي في صدري استعر
وان كنت بين البشر عن الفرح مغمور
بحريني في شهقتي يصعد شباب النهر
بحريني في لهجتي اعطي الزمان شعور
اشوف واسمع واحس واتقرى كل الصور
من تجربة بو علي صار البلد مشهور
اللي أشوفه بضوا معروف للي بصر
واللي اسمعه ف شعر في كل صدر مذكور
هالمملكة لي عمر ان زاد والا قصر
باعيالي وكل هلي للمملكة منذور
وان قالوا عن عشرة فيها اللي قلبه حجر
واللي ارتفع بالغلط واللي انتهى مكسور
آرادنا بكلمتي على اللي خشمه كبر
العشرة جذر البلد قبل زمن وعصور
عشرتنا يا بو علي عشرة شراع وسفر
ولمة ايادي ازرعت بين الحقيقة بذور
عشرتنا ما هي صحن لو طب مره انكسر
عشرتنا فزعة اهل في كل حزن وسرور
عشرتنا ويا العدل هاللي مع اسمك ظهر
تاريخ سوا الاهل بين الصدور طيور
ان هم تحنوا بسحب يطق علينا المطر
وان فاض فينا الضوا ملا فضاهم نور
وان شملوا بالهوا شملنا في كل بحر
وان بغينا السمج دشوا معانا حضور
خليفة انت الذي علمنا جيف القدر
يحضن ربيع ف شتا ويمنح مناه بذور
وان اللي يزرع وفا وان طاح بعض الثمر
بيعود لو ظل فصل تحت الثرى مطمور
ومن سار ويا العدل ما هاب اسمة خطر
ومن مشي للفرح بنى بخطاه الدور